Buat nebee ita hotu tenki halo tuir iha tempu agora hanesan: hela iha uma, keta halibur malu ema barak, tenki dook malu metru ka rua – nebee too agora ita hotu hanaran “distansia sosial”, Organizasaun Mundial da Saúde (OMS) husu ita labele bolu tan “distansia sosial”, maibee “distansia fizika”.
Tanba saa? Tanba liafuan “distansia sosial” indika katak ita tenki lakon koneksaun ho ema nebee ita hadomi. Loloos, maski ita bele dook malu, ita labele lakon koneksaun ho ema nebee importanti ba ita, tanba nee bele afeta fali ita nia saude mental, hanesan akontese dadaun ho ema barak ona.
OMS hatoo ida nee ida iha konferensia imprensa iha loron 20 Marsu. Doutora Maria Van Kerkhove, nebee servisu ba OMS, dehan katak “maski importanti ita mantém nafatin distansia fízika, ita mos tenki mantem nafatin koneksaun sosial”. Nia dehan tan: “la bandu atu ita hamnasa, la bandu atu ita koalia ho ita nia familia no buka dalan atu konekta ba malu”
Espesialista sira hatete katak kontatu sosial importanti tebes ba saude mental. Bainhira ita la iha ligasaun ba malu, bele aumenta ansiedade, senti mesak, tauk no laran moruk, nebee bele lori sosiedade ba problema seluk fali: moras mental.
Nee duni, mantém nafatin distansia fizika, maibee buka dalan hodi konekta ba malu.
Ho informsaun hosi CNN.COM