PRIMEIRU-MINISTRU TAUR MATAN RUAK HATO’O SOLIDARIEDADE BA TRAJEDIA IHA ITAEWON-SEOUL, KOREA
Dili, loron 31 fulan-outubro, tinan 2022 — Sua Eselénsia Primeiru-Ministru, Taur Matan Ruak, lori Governu no povu Timor-Leste nia naran hato’o sentidu solidariedade no profundas kondolensias ba Governu Koreanu no familia vitima sira hosi trajedia selebrasaun Heloween ne’ebé akontese iha sábadu, loron 29 fulan-outubro, iha sidade Itaewon, Seoul, Korea do Sul, ne’ebé hamate ema kuaze 146 no hakanek ema liu 150 kauza hosi dada iss ladi’ak.
Mensajen Solidariedade Sua Eselénsia Primeiru-Ministru, Taur Matan Ruak nian: “Ha’u sente triste tebes wainhira haree notisia horivel, trajedia boot iha serimónia Halloween iha sidade Itaewon, Seoul, ne’ebé hamate ema kuaze atus ida resin, ema barak sofre kanek no mós hamosu situasaun pâniku ba populasaun sira. Hodi povu no Governu Timor-Leste nia naran no ha’u-nia naran rasik, hakarak transmite ami nia solidariedade, no simpatia ne’ebé kle’an ba Governu no povu Korea Súl nian, no profundas sentidas kondolénsias ba família vítima sira hosi trajedia refere. Povu Timor-Leste nia orasaun akompaña sobreviventes sira iha situasaun difisil ida ne’e no husu korajén nafatin”.
HOTU
#MédiaGPM