Madalena Hanjam, Prezidente Cruz Vermelha Timor Leste (Foto: Andre Gusmão/Ravoz).
Prezidente Cruz Vermelha Timor Leste Madalena Hanjam, iha nia intervensaun iha cerimonia selebrasaun aniversariu Cruz Vermelha Timor Leste ba tinan 21 iha sede nasional Cruz Vermelha Tersa semana ne’e hateten, durante tinan 21 istoria Cruz Vermelha Timor Leste nia evolusaun ejistensia todan. Maske nune’e, ho suporta governu no entidades internasionais Cruz Vermelha kontinua ejisti ho nia intervensaun umanitaria iha kualker situasaun no tempu no sempre halo intervensaun iha faze primeiru sukoru ba vítimas sira nebe kona kalamidade.
Cruz Vermelha hanesan auxiliáriu ba governu tenke envolve ativamente kontribui solusiona problema barak iha nasaun tantu aihan, bé-mós, iha problema saude Cruz Vermelha presiza suporta reserva ran iha banku ran hodi salva vida pasienti kbiit laek sira nebe asumi risku ba mate. Cruz Vermelha mos hari uma saudavel no infraestrutura no halo buat sira seluk hodi hatan ba nesesidade komunidade kbiit laek sira.
To’o ohin loron nasaun infrenta problema bo’ot pandemia Covid-19 iklui dezastre naturais extreme 4 de abril liu Cruz Vermelha mos tama iha intervensaun linha primeiru sokoru fo tulun ba komunidade vítimas sira nebe kona degradasaun efeitus hosi kualker dezastre naturais nebe akontese iha nasaun laran. Madalena esplika, ejistensia Cruz Vermelha Timor Leste ho nia misaun umanitaria akapta laos deit ba komunidade iha nasaun laran maibe nia intervensaun atinji too ona ba komunidade internasional sira nebe hasoru krize iha sira nia nasaun.
Too oras ne Cruz Vermelha iha voluntarius jeral rihun 6.000 halao servisu iha areas hotu, nune’e mos iha tempu pandemia covid-19 Cruz vermelha rekruta voluntarius profesional médikus no enfermeirus 40 no aliadus engineirus konstrusaun civil. Cruz vermelha kontinua loke inskrisaun ba kualker ema se deit nebe hakarak sai membru ka vouluntarius cruz Vermelha Timor Leste. [AG]