HAHU RONA BAI-BAIN TOO SAI RONA NAIN NO IKUS SAI PASTOR
Uluk antes hau Rona Radio Voz, hau ema ida nebee iha hahalok at tebes. Hau sempre tolok, odio ema, hau mos sempre hemu bebidas alkoholico ho kolegas oioin. Hau hahu Rona Radio Voz iha tinan 2011 no hau sei eskola iha UNTL. Momentu neba tamba telefone sira sempre iha Radio no headset. Entaun Hau komesa haruka mensagem no husu muzika no muzika sira nee sempre toka hela deit tuir ita nia pedidu. Primeiro hau rona tamba senti ema tau importansia ba ita nia pedido muzika. Depois hau Rona bebeik, hau komesa ona tau atensaun ba artigo sira nebee aprezentadores sira fahe. Hau mos komesa kompara hau nia moris no hare katak Maromak iha planu furak tebes no Nia hadomi Hau. Entaun Hau mos komesa tuir atividade amizade ho aprezentadores no ouvintes sira seluk. Hau hetan komvite ba tuir kultu Joven iha igreja VC kada Sabdu. Dala balun hau mos tuir kultu kinta orasaun nian no kuandu remata Pastor ho Nia kaben sempre lori ami fila no iha kareta laran sempre dada lia kona ba Maromak Nia Liafuan no Maromak Nia diak. Maibe hau iha hau nia hanoin iha hau nia ulun “Hau labele troka Hau Nia religiao”. Hau mos hetan komvite hodi Rona testamunha Kona na kantor Lazaro nian iha Pastor nia uma no sente mudansa tebes ba testamunha nee.
Depois tinan ida, hau hasoru missionario sira husi Filipina Mai iha hau nia universidade iha fulan Novembro tinan 2012. Hau nota kona ba sira nia jeitu koalia no sira nia hahalok, entaun ho penasaran hau mos husu, “imi kristaun karik?” Sira dehan tamba sa ita dehan nunee? Hau dehan hau iha kolega balun nebee kristaun mos (Hau refere ba aprezentadores Radio no mos ema sira nebee hau hasoru iha igreja VC) no sira nia hahalok no modelu koalia kuaze hanesan imi. Entaun, sira nee ida bolu hau, tur iha hau nia sorin no fahe kona ba saida mak Jesus halo ba hau. Hau komesa senti katak afinal hau neee ema sala nain no merese ba inferno maibe Maromak husi Nia Domin haruka Jesus hodi selu hau nia sala no hau bele ba lalehan. Hau so bele simu deit Jesus sai hau nia Nai no Salvador. Husi momentu neba kedas sira komesa halo disipulu ba hau no hau mos kuriozu nafatin atu hatene Kona ba Maromak no lee Nia liafuan. Maromak komesa transforma hau nia moris. Hau hatene katak ema hotu valor iha Maromak Nia matan, Hau nia liafuan sai husi ibun tenki liafuan bensaun, no hau mos komprende katak hau nia isin nee templu Espiritu Santu nian no hau tenki kuidadu. To Ohin loron hau senti Maromak muda buat barak tebes iha hau nia moris no buat barak tebes mak hau sei nafatin deskobre Kona ba Maromak loron ba loron. Agora dadaun hau servi hanesan Pastor iha Igreja Every Nation Timor-Leste ho lideransa lokal sira.
Obrigado barak bele sai mos bensaun ba Ami Nia igreja liu husi livru “the word for today”. Ami Nia kristaun barak mak senti bensaun lee testamunha no istoria sira nebee hakerek iha livru nee.
Maromak fo bensaun ministerio Radio Voz no United Christian Broadcasters (UCB).
Gloria ba Maromak
Iha Kristu Nia Domin,
Pastor Tomas Maia