Primeiru Ministru RDTL Jeneral Taur Matan Ruak.
Dili— Primeiru Ministru RDTL Jeneral Taur Matan Ruak hateten, Guvernu la defende volume persentazen ezekusaun orsamentu bo’ot, maibe defende prinsipiu gasta osan ba saida. Primeiru Ministru hateten ida ne’e ba jornalista sira iha palásiu Prezidente hodi hatan ba impressaun negativu relasiona persentazen ezekusaun orsamentu Estadu 2022 ne’ebe sei mínimu tebes.
Primeiru Ministru afirma, Guvernu la defende ezekusaun osan deit, maibe defende ezekusaun osan ne’ebe diak, “Hau nia prisipiu la’os defende ezekusaun deit, maibe ezekusaun ida nebe di’ak katak gasta osan ba saida, tanba ezekusaun deit, bele gasta tun sa’e ezekuta hotu orsamentu, lós ona, signifika la’os gasta osan hira maibe gasta osan ba saida maka sai ejijensia nebe Guvernu tenke halo”, dehan Primeiru Ministru”. Ho nune’e, naturalmente restante orsamentu Estadu ne’ebe lagasta hotu sei fila fali ba kofre Estadu.
Hatan pergunta relasiona infraestruturas públiku estrada no ponte barak nebe afetadu husi kalamidade dezastre naturais 4 de Abril 2020 nebe to’o oras tama ona tempu udan maibe sei hela nafatin iha kondisaun aat, Primeiru Ministru rekuinese infraestrutras balun seidauk maibe balun prosesu la’o hela, “infelizmente balun seidauk rekopera, maibe balun iha prosesu hela nebe hein katak bele finaliza iha tempu badak”, dehan primeiru ministru.
Primeiru Ministru konsiente kondisaun infraestruturas real nudar preokupasaun bo’ot tanba komplika no prezudika vida seitor privadu emprezairus sira no prezudika interese públiku em jeral maibe laiha dalan seluk, so tenke servisu maka’as. [ag]