Foto: komunidade halo reklamasaun.
Dili— Populasaun reklamante liu nain 50 iha oras tk.10:00 loron Tersa dader semana ne halo asaun protesta ba Prezidensia Repúblika tanba la fo atendmentu diak ba sira nia proposta.
Reprezentante grupu populasaun reklamante Alberto Perreira no Madalena Tilman da Silva iha área resinto portal palásiu prezidenti Nicolau Lobato Tersa semana ne’e deklara ba jornalista sira hateten,
sira lamenta no deskontenti maka’as ba administrasaun Prezidensia Repúblika tanba la fó atendementu dignu ba sira nia prezensa.
Observasaun iha terrenu vizualmente nota proposta barak husi populasaun reklamante sira soe naklekar hela iha rai tama iha muru laran Palásiu Prezidensial.
Grupu reklamante ne’e klaim no argumenta katak, sira hatama proposta tanba kaer ba promesa pulítika Prezidenti Ramos Horta iha kampaña ne’ebe promete loke odamatan Prezidensia hodi fo atendementu sosial ba populasaun tomak.
Intensaun hosi proposta grupu populasaun ne’e hakarak hetan apoiu finanseirus hodi rekopera sira nia ekonomia famila hafoin infrenta situasaun difisil husi pressaun pandemia Covid-19 durante períodu tempu naruk tinan rua.
Sira konfessa simu informasaun Prezidensia Repúblika loke asesu sosial husi mídia komunikasaun sosial Radio no Televizaun, no mídia sosial.
Grupu reklamante sira hato’o proposta ba prezidensia hakarak hetan ajudus finaseirus ho montante osan variavel oin-oin hahú husi dolares $.200, $.500, $.700 to $.1.000 tuir ida-idak nia hakarak.
Sira afirma pozisaun sei kontinua metin sira nia ejizensia no sei mantein forma loron-loron iha portal Palásiu Prezidensia to’o hetan atendementu no resposta husi Prezidenti Ramos Horta ba sira nia proposta.
Iha loron hanesan Prezidensia Repúblika lansa konfernsia imprensa hodi komunika situasaun ne’ebe akontese iha Palásiu Prezidensia Republika.
Asesor polítiku prezidenti Repúblika DR.Thomas Cabral iha konferensia imprensa iha palásiu Prezidenti Nicolau Lobato deklara sai ba públiku hateten, Prezidensia Repúblika nudar orgaun soberania primeiru Estadu ne papel maka kontrolu funsionamentu Estadu. Tanba ne wainhira iha entidade ka ema ruma halo aktu sira hanesan ne lalós.
Iha konteúdu konferensia imprenza hateten, situasaun ruma nebe akontese iha Palásiu Prezidensia iha fulan hirak Prezidenti Ramos Horta hahú knaar, sirkula informasaun iha komunidade leet nebe konsidera orgaun Prezidensial hanesan fali halo atividades guvernativa ka ezekutiva ke la’os knaar Prezidensia nian.
Prezidensia rekuinese simu ona proposta 6.000, no hafoin ne’e prezidensia taka tiha ona opurtunidade ba asesu proposta. Maibe mosu tan fali proposta barak nebe deskunfia ema individu balun maka organiza ka orienta komunidade barak hodi hatama nafatin proposta. Prezidensia repúblika sei buka tuir mkotivu individu autor ruma nebe organiza situasaun refere hodi submete ba prosesu justisa.
Prezidensia rekuinese deklarasaun Prezidenti Ramos Horta iha loron 20 de maio katak, palásiu Prezidensia ne povu nian, no povu bele mai iha palásiu Prezidensia hodi hato’o ideias ka opiniaun, maibe la’os mobiliza komunidade mai simu formulariu hodi priense no hatama proposta.
Prezidensia husu ba mídia, ONG no sosiedade tomak atu hatutan isplikasaun Prezidensia nian ba komunidade atu kumpriende didiak katak, Prezidensia nudar orgaun kontrolu Estadu tomak.
Palasiu prezidensia simu ona proposta rihun nen maka tama, maibe sei hare avalia karater proposta barak husi komunidade ne’e hodi kanaliza ba ministeriu komptenti tutela sira.
Hatan ba argumentu reklamasaun grupu komunidade reklamente nebe kaer ba promesa prezidenti Ramos Horta iha kampaña eleitoral, asesor pulítiku Thomas Cabral hateten, deklarasaun iha kampaña henesan deit propaganda pulítika nebe taka tiha ona tanba eleisaun ramata tiha ona.
Labele kahur kampaña eleitoral ho aktu administrativu Prezidenti Repúblika nian.