Prezidenti Repúblika Demokrátika Timor Leste DR. Ramos Horta.
Dili– Prezidenti Repúblika Demokrátika Timor Leste DR. Ramos Horta loron Segunda 25 de Jullu ne’e fila hikas mai nasaun hafoin hala’o vizita Estadu durante semana ida ba Indonesia.
Prezidenti Indonesia Joko Widodo ofisalmente simu vizita Prezidenti Ramos Horta iha loron Tersa 19 de Jullu semana kotuk iha Palásiu Prezidensia Bogor Jawa Oeste Indonesia.
Iha konferensia imprensa imprensa iha salaun vip Aeroporto Interansional Prezidenti Nicolau Lobato deklara ba nasaun hateten, ninia vizita ba Indonesia la’o diak tebes, no nia anota Prezidente Repúblika Indonesia Joko Widodo akompainia diak lós evolusaun Timor Leste no kontenti ho relasaun nasaun rua Timor Leste ho Indonesia nebe la’o diak nafatin.
Iha enkontru ne’e xefi Estadu rua ko’alia kona ba kooperasaun nasaun rua ligadu ho lalaok segimentu akordus nebe Guvernu rua asina, alen de ko’alia asuntu balun husi ideias foun nebe Guvernu Nasaun rua sei halo segimentu atu implementa.
Prezidenti Horta hateten, iha enkontru nia hetan ideias foun produtivu balun husi Prezidenti Jokowi ligadu ho nia ideia rasik kona ba estabelesementu kumérsiu livre iha frontera terestre nasaun rua, nebe Prezidenti fo ideia atu estabelese parkeia ka estasiomanetu industrial iha teritóriu Timor Leste iha frontera terestre liga ba planu kumérsiu livre iha frontera Nasaun rua.
Prezidenti Ramos Horta mos hatudu ba Prezidenti Indonesia Joko Widodo kona inovasaun foun nebe Timor Leste aposta hanesan planu estabelesementu sistema telekomunikasaun fibra-ótica, cabo-sumarinu, inagurasaun porto Tibar iha fulan Novembru, no planu konstrusaun instalasaun Aeroporto Internasional Prezidenti Nicolau Lobato, aleinde rehabilitasaun instalasaun aeroporto Baucau, nudar avansu nebe reflete prontidaun Timor Leste atu adere ba Azean. Nebe klaramente Prezidenti Repúblika Indonesia Joko Widodo kontinua nafatin apoiu maka’as Timor Leste atu adere ba Azean.
Prezidenti Ramos Horta planeia sei kontinua nafatin nia vizita Estadu iha tempu badak vizita ba nasaun Azean balun hodi fortifika adezaun Timor Leste ba Azean iha rohan mandatu lideransa Cambodia, no sei kontinua halao vizita ba nasoins Azean sira iha mandatu lideransa Indonesia nebe sei hahú iha tinan 2023 hodi fortifika liu tan konfiansa Azean nian ba Timor Leste nia adezaun.
Ramata husi Jakarta Prezidenti Ramos Horta kontinua halao nia vizita ba Porto Laguan Baju Kupang Nusa Tengara Timur NTT nudar konvite husi guverandor Nusa tenggara Timor, hodi hare progresu diak istalasaun porto Laguan Baja nebe hatutu potensia valores bo’ot turizmu nian.
No iha oras tk.12:58 loron Segunda 25 de Jullu semana ne’e Prezidenti Ramos Horta fila hikas mai Nasaun tun iha Aeroporto Internasional Prezidenti Nicolau Lobato ho aviaun jet-privadu guvernador Nusa Tenggara Timor PK-TWY. [ag]