Prezidenti Parlamentu Nasional DR. Aniceto Guterres. (André Gusmão)
Dili– Prezidenti Parlamentu Nasional DR. Aniceto Guterres Segunda semana ne’e hateten, viazen Prezidenti Repúblika iha kontestu normal la presiza delega kompetensia ba prezidenti Parlamentu Nasional atu asusumi kompetensia Prezidenti Repúblika Interinu.
Aniceto Guterres hateten ida ne’e ba jornalista sira iha uma fukun Parlamentu Nasional Segunda semana ne’e relasiona ho deslokasaun Prezidenti Repúblika DR. Ramos Horta nebe sai husi nasaun Segunda semana ne’e hala’o vizita ba Indonesia.
Tuir lei, Prezidenti Repúblika so bele delega kompetensia ba Prezidenti Parlamentu Nasional atu asumi kompetensia nudar Prezidenti Repúblika interinu wainhira deslokasaun Prezidenti Repúblika ba asuntu privadu ka hala’o viazen liu períodu tempu loron sanulu-resin-lima. Ne’e katak, wainhira durasaun tempu Prezidenti Repúblika sai husi Nasaun hala’o viazen ba rai liur menus husi loron-sanulu-resin-lima konsidera nudar viazen normal, nebe lapresiza delegasaun kompetensia ba Prezidenti Parlamentu Nasional atu assumi kompetensia nudar Prezidenti Repúblika interinu.
Aniceto haktuir, Prezidenti Repúblika iha nia ajenda rasik tuir nia kompetensia konstitusional atu ko’alia asuntu ruma ho prezidenti Repúblika Indonesia, no Parlamentu Nasional labele interfere. [ag]