Prezidenti Repúblika Demokrátika Timor Leste DR. Ramos Horta.
Dili– Prezidenti Repúblika Demokrátika Timor Leste DR. Ramos Horta kuarta semana ne’e halao vizita ba instalasoins kompainia operador telekomunikasaun Timor Telecom.
Diretor jurídiku relasaun institusionais Timor Telecom Manuel Cáceres iha nia liafuan abertura ba serimonia vizita Prezidenti Repúblika iha edifisiu sentral Kompainia operador telekomunikasaun Timor Telecom Caicoli Quarta semana ne’e agradese prezensa Prezidente Ramos Horta iha edifisiu sentral instalasoins Timor Telecom.
Cárceres relata ba Prezidenti RDTL katak, hafoin tinan 15 Timor Telecom aposta mudansa bo’ot nebe ohin loron kargo xefias Timor Telecom Timor maka no operasaun Timor Telecom Timor oan maka okupa hotu. Manuel Cárceres sublina, ho prezesa Prezidenti Repúblika iha Timor Telekom halo Timor oan sira la sente mesak no hetan korazen bo’ot liu tan hodi lori Timor Telecom avansa ba oin.
Enkuantu Prezidenti Repúblika Demokrátika Timor Leste DR. Ramos Horta iha nia intervensaun hateten, ninia vizita ba Timor Telecom loron ne’e ba dala tolu hafoin nia vizita primeiru no segundu ba Timor Telecom iha tinan 2002 no iha tinan 2006 iha momentu ne’ebe Timor Leste hahú estabelese operasaun telekomunikasaun ho apoiu investimentu husi Portugal Telecom ho valor finanseirus 50 millioins dolares Americano ne’ebe ijisti ho kondisaun zona rede telekomunikasaun limitadu.
Prezidente Ramos Horta konfessa impresionadu no orguillu wainhira hare husi besik ba persistensia no progresu avansu Timor Telecom ho estruturas xefias ba operasaun iha dominasaun rekursu umanu Timor oan hotu kedas, hodi fo apoiu moral no apoiu pulítiku Estadu ba Timor oan sira nebe servisu iha Timor Telecom nudar instituisaun privada Timorense atu kontinua aposta kualidade hodi serví diakliu tan nasaun ba futuru.
Prezidenti Ramos Horta rekuinese Estadu ka Guvernu Deve hela osan Timor Telecom millioins 5 dolares Americano, no promete sei lítik onestidade Primeiru Ministru atu bele selu ramata tiha dívidas ba kompainia Timor Telecom millioins 5 dolares Americano. Prezidente Ramos Horta Promete sei rekomenda ba Primeiru Ministru atu tau matan didiak ejistensia Timor Telecom nudar instituisaun privadas Timorense.
Prezidenti rekuinese pulítika Guvernu aplika konkorensia telekomunikasaun iha nasaun laran diak, maibe sujere tenke iha apoiu maka’as ba Timor Telecom nudar instituisaun privadas Timorense nian.
Prezidenti Ramos Horta konfessa akompainia dezafius ne’ebe Timor Telecom no kompainia operador sira seluk infrenta tanba folin satélite nebe karun.
Prezidenti Repúblika fo espektasaun katak, tinan rua tolu tan Timor Leste sei iha ona satélite Cabusumarinu nebe dada mai husi Darwin Australia, no husi Alor Indonesia, enkuantu fibra ótika sei dada mai husi Atambua Indonesia nebe sei koloka Timor Leste ba sistema telekomunikasaun modernu nivel internasional hanesan ho nasaun Sigapura no Australia ne’ebe kualdiade diak ho folin baratu.
Iha nia vizita ne Prezidenti Ramos Horta observa direta ba instalasoin ekipamentus operasan telekomunikasaun Timor Telecom nian hanesan; sala NOC no sala DSI, sistema enerjia, sala transmisaun, sala data centre-1 no sala data centre-2. [ag]