Helio Diaz da Silva, Prezidenti movimentu Kamponeza Timor Leste (Mokatil) ho estrutura.
Dili– Estrutura Movimentu Kamponeza Timor Leste (Mokatil) Segunda semana ne’e halao audiensia ho Prezidenti Repúblika DR. Ramos Horta iha Palásiu Prezidenti Nicolau Lobato, hodi husu atensaun no apoiu Prezidenti Repúblika relasiona ona ho funsaun Mokatil, dezafius no problema finseirus hirak ne’ebe Mokatil infrenta.
Prezidenti Movimentu Kamponeza Timor Leste Helio Diaz da Silva ba jornalista sira isplika, iha audiensia ne’e Mokatil afirma nakloke pozisaun fo apoiu pulítika Prezidenti Ramos Horta ba hasa’e volume no kualidade ekonomia kamponeza iha nivel baze. No Mokatil husu Prezidenti Repúblika kontinua tau matan nafatin povu kbiit laek sira iha área rural nebe infrenta problema ekonomia familiar, no tau matan sériu ba agrikultor sira nia volume produsaun no asesu merkadu ba sira nia produtu.
Iha audiensia ne’e Mokatil konvida Prezidenti Ramos Horta atu marka prezensa no fo intervensaun pulítika ba eventu assembleia trabalhador nasional Mokatil nebe sei konsentra massa kamponeza iha sentru formasaun kamponeza Francisco Xavier do Amaral iha munisipiu Aileu.
Mokatil mos aprezenta preokupasaun ba Prezidenti Ramos Horta relasiona ho problema edifisiu Mokatil anterior hetan notifikasaun husi Ministeriu Justisa no obriga deslokasaun Movimentu Kamponeza Timor Leste husi edifisu efere. Edifisu Movimentu Kamponeza Timor Leste ne’ebe ijisti duranti ne’e nudar sentru formasaun ba juventude sira gratuitamente atu sai rekursu agrikultor nebe kualifikadu hodi atinji persentazen produsaun nasional bo’ot ho kualidade diak ba futuru nasaun nian.
Prezidenti Repúblika DR. Ramos Horta fo resposta prontidaun atu suporta knar Mokatil no promete sei buka meius atu apoia atividades Movimentu Kamponeza Timor Leste nian.Prezidenti Ramos Horta rekuinese iha kuinesementu diak ba ejistensia no atividades hotu ne’ebe Mokatil halo iha nasaun laran liu-liu iha âmbitu luta kontra pobreza iha zona rural sira.
Prezidenti Ramos Horta esplika ba estrutura Mokatil katak, prezidensia Repúblika laiha verva finanseirus investimentu atu priense proposta Mokatil, maibe sei hatutan proposta ka preokupasaun Mokatil ba Guvernu liu husi minsiteriu tutela servisu sosiais, alem de halo aprosimasaun klean ho Primeiru Minsitru atu fo solusaun ba proposta Mokatil karakter finseirus.
Prezidenti Ramos Horta mos promete sei buka dalan atu hetan apoiu husi kooperasaun externa sira liu husi embaxador estranjeirus iha rai laran ne’ebe iha posibilidade doasaun finanseirus ba proposta no preokupasaun Mokatil. [ag]