Primeiru Ministru, Jeneral Taur Matan Ruak.
Dili— Primeiru Ministru Kinta semana ne’e hateten, Guvernu buka hela kandidatu atu simu nomeasaun nudar sekretariu Estadu nebe trata asuntu konaba komunidade Timor oan hela iha rai liur. Posivelmente iha tempu badak sei halo nomeasaun ba kandidatu ida hodi hahú servisu ba asuntus komunidade Timor-oan iha rai liur.
Hatan kona ba ijistensia ajensia krimi organizadu nebe organiza sidadaun Timor-oan ba servisu iha rai liur orientadu ho motivu krimi organizada tráfiku umanu, Primeiru Minsitru husu ona ba Ministeriu Justisa no PCIC atu kaptura hotu ajensia no ema sira nebe involve iha direta-indireta atividade krimi organizadu tráfiku umanu, inklui kaptura hotu ema sira nebe hatene autor no informasaun kona ba tráfiku umanu maibe nonók hela lakohi fo keixa ba autoridade pulísia.
Primeiru Ministru hteten, Guvernu kumpriende sidadaun hotu halo esforsu buka moris maibe tenke liu husi dalan saudavel tuir lei, no husu ba sidadaun Timor-oan hotu tenke respeita Guvernu nudar lider Nasaun no obedese konstituisaun, lei no regras regulamentares nebe estabelesidu iha Nasaun RDTL. Primeiru Ministru hateten, nia deklara juramentu perante Nasaun no Estadu atu kumpri konstituisaun no lei RDTL, Nune’e nia iha poder jurídiku atu obriga sidadaun Timor-oan hotu tenke kumpri konstituisaun no lei RDTL. [ag]