Primeiru Ministru RDTL Jeneral Taur Matan Ruak.
Dili— Primeiru Ministru RDTL Jeneral Taur Matan Ruak Kinta semana ne’e halao enkontru semanal ho Prezidenti Repúblika DR. Ramos Horta iha palasiu Prezidenti Nicolau Lobato. Primeiru Ministru relata ba Xefi Estadu kona ba intervensaun Guvernu ba populasaun vítimas dezestre naturais ne’ebe foin lalais akontese iha munisipiu hirak.
Primeiru Ministru jeneral Taur Matan Ruak esplika ba jornalista sira hateten, udan bot ne’ebe foin lalais akontese tanba mudansa klimátika implika inundasaun bo’ot afeta populasaun barak sai vítima, no Guvernu tenke mobiliza rekursu hodi fo solusaun ba populasaun vítimas sira.
Dadus provezoriu rejista aserka de populasaun uma kain 900 maka sai vítimas, enkuantu sekretariadu Estadu protesaun sivil oras ne’e intensivamente halao hela levantamentu dadus fixu populasaun vítimas nebe sai baze ba Guvernu atu fo solusaun.
Iha enkontru xefi Guvernu ho xefi estadu loron ne ko’alia mos kona ba ajenda Prezidenti Repúblika ne’ebe sei hala’o vizita ba munisipiu Ermera hodi halo diálogu ho komunidade Ermera kona ba produtu lokal kafé orgániku iha munisipiu Ermera. [ag]