Prezidenti Republika José Ramos Horta.
Dili– Prezidenti Ramos Horta Sesta semana ne’e deklara nakloke nia admirasaun no elojiu ba desizaun prezidenti Repúblika Indonesia Joko Widodo ne’ebe halao ona vizita diplomátiku ba nasaun rua Russia no Ukraina nebe iha hela tempertura manas funu laran. “Hau admira prezidenti Jokowi nia desizaun halao vizita ba nasaun rua Russia no Ukraina nebe funu namanas hela”, dehan prezidenti Ramos Horta iha programa transmisaun direta nia entrevista iha Stúdio Televizaun Edukasaun Timor.
Prezidenti Ramos Horta konsidera Prezidenti Jokowi nudar lider úniku nebe konsege ba to’o nasaun rua no konsege ko’alia ho prezidenti Ukraina Zelensky no prezidenti Russia Vladimir Putin iha temperatura manas funu laran. Enkuantu lider nasaun Europa sira membru Nato ne’ebe hola pozisaun pulítika konfrontasaun total hasoru Russia, so ba to’o deit Ukraina maibe laba to’o Russia.
Tanba ne’e Ramos Horta dehan, aktu brilhante Jokowi halo Indonesia oras ne’e asumi papel konstrutivu hodi solusiona konfrontasaun funu Russia-Ukraina, nebe sei fo impaktu pozitivu ba mundu tomak inklui Timor Leste atu bele sai husi inflasaun ekonómika global ne’ebe implika folin mina sa’e, hahan no saan hotu folin karun iha mundu tomak tanba kauza konfrontasaun funu Russia Ukraina. [ag]