Prezidenti Autoridade Munisipiu Dili Guilhermina Filomena Saldanha Ribeiro.
Dili– Ekipe Integradu Autoridade Munisipiu Dili Kuarta semana ne’e lansa atuasaun ba negosiante produtu lokal sira iha merkadu Manleuana ne’ebe uza espasu merkadu latuir regras no orden Guvernu.
Prezidenti autoridade munisipiu Dili Guilhermina Filomena Saldanha Ribeiro, iha okaziaun atuasaun iha merkadu Manleuana ba jornalista sira hateten, bazeia ba planu autoridade munisipiu Dili atu reorganiza no readministra komunidade negosiante sira nebe fa’an sasan iha merkadu sira munisipiu Dili, tanba ne’e autoridade halo intervensaun hodi reorganiza negosiante sira nebe okupa estasionamentu no espasu jardim merkadu atu tama hotu fa’an iha fasilidades bankada barak ne’ebe Guvernu prepara iha uma laran ke durante ne’e negosiante sira lauza.
Hamutuk negosiante 126 maka kona atuasaun ne’e, durante ne’e okupa estasionamentu no jardim merkadu hodi fa’an sira nia sasan produtu lokal. Intevensaun ne’e ordena negosiante sira hala’o negosiu iha merkadu tuir fatin hodi fo balansu efetivu ba negosiante hotu bele hetan sosa husi komprador sira. No autoridade munisipiu Dili sei tau vizilansia rigurozu durante tempu loron tolu hodi asegura negosiante sira tenke koopera no kumpri lolós orden nebe hatur ona iha merkadu Manleuana.
Enkuatu negosiante produ lokal Noemia da Costa no Isabel da Conceição ko’alia ba Radio Voz hateten, sira simu atuasaun husi autoridade munisipiu Dili tenke sai husi estasionamentu no jardim no tama hotu ba fa’an iha uma merkadu laran, sira rekuinese fatin nebe autoridade destaka ba sira agora iha uma laran ne diak fo garantia siguransa ba sira hodi fa’an sasan ho diak no livre husi loron manas no udan, maibe sira preokupa maka sira nia sasan la folin ka ema la sosa.
Tanba tuir sira, naturalmente sosador sira prefere liu sosa produtu lokal iha koridor estrada, koridor jardin no koridor estasionamentu merkadu, no sosador sira kuaze ladun konfortavel atu tama hodi sosa sasan produtu lokal iha parte uma laran. Negosiante sira nebe kona deslokasaun ne fa’an produtu lokal hanesan aifuan hudi, aidila, sabraka, derok, ainanás, tomate, modo tahan, repolho, aidila dikin, fehuk, talas, aifarina, lakeru no seluk tan. [ag]