Prezidenti Repúblika Demokrátika Timor Leste DR. Ramos Horta.
Dili— Prezidenti Repúblika Demokrátika Timor Leste DR. Ramos Horta Segunda semana ne’e hala’o vizita kortezia dahuluk ba Quartel FALINTIL-Forsa Defeza Timor Leste Fatuhada.
Hatan ba jornalista sira Prezidenti Repúblika hateten, nudar Prezidenti Repúblika no nudar komandante supremu forsas armadas hala’o vizita dahuluk ba Quartel Jeneral F-FDTL hodi hare husi besik situasaun real atual no rona rezultadu avaliasaun husi xefi Estadu maiorJjeneral kona ba progresu no rezultadu implementasaun planu dezenvolvimentu forsa F-FDTL husi primeiru estudu tempu UNTAET, husi estudu 2020 no estudu foun nebe xefi Estadu maior jeneral F-FDTL halo ba dezenvolvimentu F-FDTL, no kona ba asuntu dezafius no doutrina militar.
Iha nia vizita kortezia ne’e Prezidenti Ramos Horta halo observasaun mos ba espozisaun materiais militar forsa F-FDTL, no rekuinese dezevolvimentu forsas militar seidauk sufisienti ka nunka sufisienti kontra evolusaun dezafius mundu global nebe sempre mosu tan no permanesa bebeik. Tanba ko’alia militar laos deit kona ba kilat, laos deit kestaun tékniku operasional militar nian, maibe presiza buat barak ligadu nebe tenke dezenvolve iha forsa militar. Buat barak seidauk kompletu ba forsa F-FDTL tanba mos situasaun Estadu Timor Leste nebe sei frazil.
Prezidenti repúblika alerta atu Estadu tenke hola atensaun ba sistema manutensaun ba infraestruturas no reforma sistema lojistiku, tenke fo meius no fasilidade ba siguransa marítima navais no meius aeros (lalehan) nian. Prezidenti Horta agradese no parabeniza lideransa titulares orgaun soberania Estadu sesante tomak Prezidenti Repúblika sesante sira, Primeiru Ministru sesante sira, no Guvernu tomak ne’ebe ukun nasaun ne hahú husi tinan 2022 to’o ohin loron, nebe kontribui ona pozitivamente ba dezenvolvimentu forsa F-FDTL ida profisional.
Prezidenti Ramos Horta forsas armadas atu kontinua kaer metin ho firmeza misaun F-FDTL hamutuk instituisaun Estadu tomak hodi kontinua tanen metin dame nasional no internasional, no nafatin hamrik iha liña oin fo tulun ho lais ba povu wainhira infrenta problemas dezastre naturais. [ag]