DR. Jose Ramos Horta. (Foto fontes: google)
Eis prezidente RDTL no diplomata internasional DR. Jose Ramos Horta, liu husi konferensia imprenza iha nia rezidensia Farol Segunda semana ne’e deklara lamentasaun ba pozisaun Timor Leste nebe liu husi embaxador ba ONU vota abstensaun ba resolusaun Nações Unidas.
Konteudu resolusaun nebe membru nações ONU vota relasiona ho krize Myanmar kontempla kondenesaun kontra golpe militar Myanmar nebe hadau ukun husi prezidenti konstitusional Myanmar Aun Su Chi, ejije militar Myanmar hapara asaun kriminal tiru mate ema sivil, no ejije militar Myanmar loke asesu ba enviadu nasoins unidas tama halo mediasaun hodi hetan solusaun ba krize Myanmar.
Ramos Horta lamenta tanba husi kompozisaun rezultadu votasaun ba resolusaun Nações unidas ne’e hamutuk nasaun membru ONU 119 maka vota afavor, no 36 vota abstensaun, Timor Leste inklui iha pozisaun vota abstensaun.
Ramos Horta alerta katak, ho pozisaun vota abstensaun ba resolusaun ONU ne iha matan mundu internasional Timor Leste nia naran monu tanba devia vota afavor ba resolusaun ONU nebe asumi tema direitus umanus paz no seguransa no kondena maka’as golpe militar Myanmar, no kondena atktu violasaun direitus umanus militar Myanmar nebe hadau ukun husi prezidenti Myanmar eleitu Aun Su Chi nia liman liu husi dalan golpe.
Tuir Ramos Horta, Timor Leste nebe desde uluk rekuinesidu iha mundu nudar nasaun nebe kaer metin prinsipiu paz estabildiade seguransa no anti violasaun direitus umanus sei difisil tebes rekopera hikas fali naran diak.
- Ramos Horta konsidera situasaun ne’e nudar frakeza Ministeriu Negosio Estranjeirus nebe la konsege hare estratezia ekilíbriu diplomátiku aliansas mundu global.
Tuir Ramos Horta, solusaun diak liu ba militar Myanmar nebe halo golpe tenki entrega hikas ukun ba prezidentui Myanmar konstitusional eleitu Aun Su Chi no tenki hakiduk. Hafoin maka tama ba mediasaun ba diálogu entre prezidenti Myanmar konstitusional Aun su Chi ho militar hodi hetan solusaun ba problema Myanmar. [AG]